3 Purok Nasug-an

Ni Alex Mapoy

Gov. Angelica Rosedell Amante – Matba

SANTIAGO, Agusan del Norte – Tulo ka purok sa lungsod sa Santiago Agusan del Norte ang hingpit nang nahatagan sa linya sa kuryente.

Partikular nga mga purok nga nahatagan sa linya sa kuryente ang Purok 4, Purok 5, ug Sitio Kasagayan sakop sa Brgy. Pangaylan sa maong lungsod.

Ang katumanan sa dugay nang pangandoy sa mga residente tungod kini sa nagpadayon nga Sitio Electrification Program (SEP) sa nasudnong kagamhanan ug hugot nga suporta sa probensyal nga kagamhanan.

Nanguna sa gihimong Power Switch – On Ceremony si Gov. Angelica Rosedell Amante – Matba sinaksihan sa mga benepisyaryong residente.

Subay niini, gikalipay pag-ayo sa mga residente ingon man sa mga lumad nga nakaabot na sa hingpit sa ilang dapit ang kuryente nga dugay na nga ilang gipangandoy.

Ang pag-abot sa kuryente sa tulo ka mga purok magdala og kalamboan sanglit daghan naman unya ang kausaban labi na panahon sa gabii diin mahatagan na og kalingawan ang mga nahisgotan pinaagi sa pagtan-aw sa telebisyon.

Lauman nga daghan pang mga sitio sa probensya ang maabtan og kuryente subay sa paningkamot sa nasudnong kagamhanan ug sa probensya.