Multi-Million Projects Gitunol

Ni Alex Mapoy

BUTUAN CITY – Hingpit nang gitunol sa Department of Interior and Local Government (DILG) Caraga ang multi-million pesos nga kantidad sa mga proyekto ngadto sa pipila ka mga lungsod ug probensya ning rehiyon sa nakalabay’ng semana.

Sa impormasyon ni Don Manuelo O. Patrimonio sa DILG Caraga, ang nahisgotang pundo ang gikuha gikan sa Bottom-Up Budgeting (BUB), Sagana at Ligtas na Tubig sa Lahat Program (SALINTUBIG), ug Payapa at Masaganang Pamayanan (PAMANA) Program sa nasudnong kagamhanan nga gipaagi sa DILG.

Giklaro ni Patrimonio, ang pundong gipagawas sa ahensya ug gitunol sa nagkadaiyang Local Government Units (LGUs) gamiton alang sa “water and road projects.”

Nasayran nga personal nga gitunol ni DILG Caraga Regional Director Lilibeth A. Famacion, CESO III ang nagkadaiyang cheque ngadto sa mga benepisyaryong LGUs ning rehiyon.

Tulo ka mga lungsod sa Agusan del Sur ang nagbahin sa P6 milyones nga kantidad sa cheque diin P1 million ang gitunol ngadto sa representante sa LGU La Paz, P4.25 milyones sa LGU Prosperidad, ug P750,000 sa LGU Rosario kansang pundo gamiton alang sa BUB Water Projects.

Ang lungsod usab sa Tubajon, sakop sa Province of Dinagat Islands (PDI) nakadawat og cheque balor P1 million alang sa SALINTUBIG Project samtang ang probensya sa Surigao del Sur ang nakadawat og P800,000 nga pundo alang sa construction sa water projects kansang pundo gikuha sa PAMANA.

Gitunol usab sa rehiyonal nga buhatan ang P120 milyones nga kantidad sa cheque ngadto sa probensya sa Agusan del Norte, P64 milyones sa Agusan del Sur, ug P40 milyones sa Surigao del Norte alang sa ilang proyektong pang-imprastraktura sama sa kalsada kansang pundo gikuha gikan sa PAMANA nga programa.

Ang multi-million pesos nga kantidad sa mga cheque ang gitunol sa rehiyonal nga buhatan sa DILG Caraga atol sa gihimong Regional Conferment Ceremony sa Seal of Good Local Governance (SGLG) 2015 diha sa Almont Inland Resort and Convention Center ning siyudad.

Nagsumikad ang SGLG sa Seal of Good Housekeeping kansang tuyo mao ang pag-asdang sa transparensiya ug accountability sa operisyon sa lokal nga panggamhanan.