17 Kaso Gihukman sa NLRC Caraga

Ni Alex Mapoy

NLRC Caraga NLRC Caraga Administrative Officer V Robert Aying

BUTUAN CITY – Dise-siete ka mga kaso nga giduso ngadto sa National Labor Relations Commission (NLRC) Caraga ang napakanaugan og desisyon sa buhatan basi sa merito sa nakalabay’ng bulan sa Agosto ning tuiga.

Sa maong ihap, napulo ka mga kaso ang nahukman sa komisyon pabor sa reklamante samtang pito usab ka mga kaso ang na desisyonan pabor sa management.

Gipahayag ni NLRC Caraga NLRC Caraga Administrative Officer V Robert Aying, tanang kaso nga gipakanaugan og desisyon sa ilang buhatan ang gihukman pinasubay sa sirkumstansiya ug ebidensiya nga gipresentar sa duha ka habig.

Dugang ni Aying, kadtong mga kaso nga giduso, apan huyang ang ebidensya, ang desisyon pabor sa gireklamo o management.

Samtang, kadtong mga kaso nga giduso diin dunay lig-ong ebidensiya ang reklamante samtang pakyas ang gireklamo pagpresentar sa lig-ong basehan aron kontrahon ang posisyon sa reklamante, ang desisyon sa komisyon, pabor ngadto sa nagreklamo.

Pasabot sa opisyal, tanang kaso nga nadawat sa ilang opisina ang magdaug lamang sa mga ebidensya nga ihikyad sa matag partido labi na kon dili kini magkasabot sa panahon nga suwayan kini pag-areglo sa komisyon.

Una nang gipasabot sa opisyal nga tanang kaso nga iduso ang paningkamotan sa komisyon nga areglohon aron dili na kini mo dako pa, malikayan usab ang tumang kahasol, ug dili usab magastohan pa pag-ayo ang duha ka habig.