Wednesday, September 9, 2015

Kritisismo sa Media, Welcome sa AFP

Ni Alex Mapoy

Gitudloan sa 401st Brigade Philippine Army ang mga media practitioners sa Agusan del Sur ug Agusan del Norte kon unsaon paghawid og armas ingon man pagpabuto. Photo by Alex Mapoy

PROSPERIDAD, Agusan del Sur – Ikalipay sa liderato ni 401st Brigade Commander Col. Alexander Macario ang bisan unsa mang kritisismo nga madawat gikan sa media batok kanila.

Sumala ni Col. Macario, dako og tabang ang bisan unsa mang kritisismo gikan sa media kanila sanglit makapahimo kini kanila nga mahimong lig-ong nga tigbalantay sa katawhan.

401st Brigade Commander Col. Alexander Macario
Dugang ni Col. Macario, ang kritisismo nga ilang madawat ang isipon nila kining positibo aron makorehian ang sayop niining nahimo.

Giangkon ni Col. Macario nga tawo usab sila ug dili perpekto hinungdan nga dunay mga higayon nga sila makahimo og kasaypanan.

Pamugos sa opisyal, dili nila ikasuko ang unsa mang pagsaway nga himuon sa mga tigbalita kanila sanglit alang ra man usab kini sa ilang kaayohan.

Apan gihangyo usab sa opisyal ngadto sa media, kon dunay mga maayong buhat nga ilang mahimo, angayan usab nga hatagan kini og bili ug maayong ipaabot kini sa katawhan nga ang kasundalohan, wala nagpasagad paghimo sa tahas nga gisangon kanila.

Ang giluwatang pamahayag sa opisyal gihimo atubangan sa mga media practitioners sa Agusan del Sur ug Agusan del Norte atol sa gipahigayong 401st Infantry “Unity” Brigade Media Gathering and Team Building sa New Leyte, Brgy. Awa, Prosperidad Agusan del Sur adtong adlaw’ng Bernes.

Kinasingkasing usab nga nipasalamat ang opisyal sa tanang media practitioner nga nitunga sa maong kalihokan sanglit sinugdanan matod pa kini sa pagpahugot sa maayong relasyon tali kanila ug sa media. 

No comments:

Post a Comment