Thursday, September 10, 2015

7 Tips Pangkontra sa Global Warming, Gibida

Ni Alex Mapoy
Commissioner Heherson T. Alvarez
BUTUAN CITY – Bunga sa inanay nga pagtaas sa temperatura sa kalibotan, gidiga sa Climate Change Commission ang pito ka mga paagi aron kini mabatokan.

Sumala ni Commissioner Heherson T. Alvarez, angayan nga magdaginot sa paggamit sa kuryente ug hulipan ang karaang suga sa LED bulbs.

Dugang ni Alvarez, likayan usab ang paggamit sa mga luho nga butang sama sa sapatos ug angayang batasanon sa katawhan ang pagpalit sa mga butang nga haum sa panginahanglan ug puwedeng ma-recycle.

Angayan usab seguradohon niadtong dunay mga sakyanan nga limpiyo ug anaa sa maayong kondisyon ang makina sa sakyanan sanglit kon kini limpiyo, dili mo buga og itom nga aso ang makina.

Mas maayo usab nga magbaktas ang mga tawo o kaha mag-bisiklita, o kaha manakayan na lamang aron gamay na lamang nga sakyanan ang mo buga og aso ug kon duol lamang ang lakaw, mas maayong baktason na lamang kini.

Batasanon usab sa tanan ang pagtanom og semilya sa kahoy sanglit ang kahoy mo suyop sa carbon sa ingon dili kini mapadulong sa kawanangan nga maoy isa sa hinungdan nga mo init pag-ayo ang palibot.

Gitin-aw sa opisyal, kon lapad ang kalasangan, daghang carbon ang masuyop ug labaw sa tanan, mo bugnaw ang palibot.

Basi sa pagtuon sa mga eksperto, ang kabugnaw sa isa ka punoan sa kahoy, katumbas kini sa matod pa, “ten room-size air conditioners.”

Angayan usab matod pa, minusan ang pagkaon og karne sanglit ang mga mananap sama sab aka, kusog mo pagawas og methane tungod sa ilang pinasahi nga paagi sa pagtunaw sa ilang kinaon, dili susama sa tawo.

Sa pagtuon, ang isa ka baka, kayang mo buga og methane katumbas sa kadaghan sa carbon nga gibuga sa isa ka sakyanan.

Alayon niini, nanghinaut na lamang ang komisyoner nga suportahan sa katawhan ang giasdang nga adbokasiya sanglit ang tanan maoy makapahimulos niini.

No comments:

Post a Comment