18 LGUs Gibansay

Ni Alex Mapoy

Nakatutok ang tanang partisipante sa tagsa-tagsa niini ka mga laptop atol sa gihimong Quantum GIS mapping software aron makagama og hazard maps sa ilang lokalidad. Photo courtesy of DILG Caraga

BUTUAN CITY – Dise-otso (18) ka mga local government units (LGUs) ning rehiyon sa Caraga ang gipailawom sa pagbansay kabahin sa Geographic Information System (GIS) for Climate and Disaster Risk and Vulnerability Reduction diha sa Almont Inland Hotel ning siyudad.

Gibahin sa duha ka hugna ang maong training nga gisalmotan sa Municipal Disaster Risk Reduction and Management Officers (MDDRMOs), Municipal Planning and Development Coordinators (MPDCs), Information and Technology Staff, ug DILG Municipal Local Government Operations Officers (MLGOOs).

Ang nahisgotang mga LGUs gilangkoban sa mga lungsod sa Carmen, Carrascal, Cortes, Lianga, Madrid, Marihatag, Tago, ug San Agustin pulos sakop sa probensya sa Surigao del Sur kinsa maoy nisabak sa unang hugna sa pagbansay.

Sa ikaduhang hugna, ang mga nisalmot naglangkob sa Cantilan, San Miguel, ug Lingig pulos sakop sa probensya sa Surigao del Sur; Del Carmen, General Luna, ug San Isidro pulos sakop sa probensya sa Surigao del Norte; Dinagat, Basilisa ug Tubajon sa Dinagat Islands; ug lungsod sa Nasipit sakop sa Agusan del Norte.

Ang piniling partisipante mao kadtong mga lungsod nga nahimutang sa sidlakang kabaybayunan ug lantad sa nagkadaiyang kalamidad.

Sumala ni Naomi C. Orog sa DILG Caraga, katuyoan sa kalihokan mao ang pagbansay sa mga nahibiling lungsod nga nahimutang sa gikonsiderang “highly vulnerable coastal areas” aron mapalambo ang “local geographic information system (LGIS).”

Ang LGIS dako og tabang sa mga LGUs nga mapalambo ang gihimong pagpangandam sa bisan unsa nga katalagman labi na sa aspeto sa “response capacity” labi na sa pagmugma og “geographical hazard maps” sa ingon makamugna sa usa ka nilangkob ug komprehensibong plano sa lokal nga kagamhanan ug pagmugna og “disaster mitigation.”

Dumduman nga sa nakalabay’ng tuig, napailawom sa GIS training ang mga lungsod nga lantad usab sa kalamidad labi na ang mga lungsod nga anaa daplin sa Agusan River Basin sama sa 14 ka mga LGUs sa Agusan del Sur nga naglangkob sa Bayugan City, Bunawan, Esperanza, La Paz, Loreto, Prosperidad, Rosario, San Francisco, San Luis, Sta. Josefa, Sibagat, Talacogon, Trento, ug Veruela samtang sa Agusan del Norte, lakip nga nabansay ang Butuan City, Las Nieves, ug Buenavista.