4 Probensya ug 1 Lungsod Gipasidunggan

Ni Alex Mapoy

Mga awardee sa SGLG 2015 (L-R): Surigao del Norte Governor Sol Matugas, DILG13 RD Lilibeth Famacion; Agusan del Norte Governor Ma. Angelica Amante-Matba, Dinagat Islands Vice Gov. Benglen Ecleo, Agusan del Sur Vice Gov. Santiago Cane, Socorro Mayor Denia Florano, ug DILG13 ARD Donald Seronay. Photo courtesy of DLG Caraga

BUTUAN CITY – Upat ka mga probensya ug isa ka lungsod sa rehiyon sa Caraga ang gihatagan og pasidungog sa Department of the Interior and Local Government (DILG) Caraga sa Almont Inland Resort and Convention Center ning siyudad sa nakalabay’ng semana.

Gilangkoban kini sa probensya sa Agusan del Sur kansang pasidungog gidawat ni Vice Gov. Santiago Cane, Province of Dinagat Islands kansang pasidungog gidawat ni Vice Gov. Benglen Ecleo, Agusan del Norte nga gidawat ni Gov. Ma. Angelica Rosedell Amante-Matba, ug Surigao del Norte nga gidawat ni Gov. Sol Matugas ug lungsod sa Socorro, Surigao del Norte nga gidawat ni Mayor Denia Florano.

Gawas niana, gihatagan usab og Certificate of Recognition ang 73 ka mga LGUs nga naglangkob sa lungsod, siyudad, ug probensya.

Nanguna sa paghatag pasidungog si DILG Caraga Regional Director Lilibeth A. Famacion, CESO III.

Sumala ni Don Manuelo O. Patrimonio sa DILG Caraga, napasidunggan ang nahisgotang mga Local Government Units (LGUs) sa rehiyonal nga buhatan subay sa gipasiugdahang Seal of Good Local Governance (SGLG) 2015.

Dugang ni Patrimonio, nadawat sa mga awardee ang P7 milyones alang sa probensya, P5 milyones alang sa siyudad, ug P3 milyones alang sa lungsod isip insentibo.

Katuyoan sa kalihokan mao ang paghatag kadasig sa tanang LGUs nga mahimong abre sa kalamboang ihanyag sa nasudnong kagamhanan ingon man sa nagkadaiyang institusyon nga maghatag og ayudang pinansyal.

Gihimo ang paghatag pasidungog atol sa gipahigayong Regional Conferment Ceremony sa SGLG 2015 kansang kalihokan gisabak sa tema, “Pagkilala sa Katapatan at Kahusayan ng Pamahalaang Lokal.”

Mokabat sa 252 ka mga tawo ang nitambong sa aktibidad nga naglangkob sa duha ka gobernador, 30 ka mayor, 35 ka Local Officials, 20 ka Local Functionaries, 92 ka mga opisyal sa DILG ingon man empleyado, 8 ka Regional Directors/Representatives sa SGLG Regional Partner Agencies ug 65 ka mga LGU personnel.