Libreng Bag sa Probensya Gitunol

Ni Alex Mapoy

Gikalipay sa mga estudyante nga taga – Brgy. Simbalan, Buenavista Agusan del Norte ang school bag nga libreng gitunol ni Agusan del Norte Governor Maria Angelica Rosedell Amante Matba. Photo courtesy of Sonny T. Montilla

BUENAVISTA, Agusan del Norte – Kapin isa ka libo ka mga school bags ang gitunol sa probensyal nga kagamhanan sa Agusan del Norte ngadto sa mga magtutungha kinsa nanimuyo sa Brgy. Simbalan, Buenavista sakop sa naasoy’ng probensya.

Gihimo kini sa probensya taliwala nga hapit na niabot ang semestral break nga kasagaran mahitabo sa bulan sa Oktobre ug ang naasoy’ng mga bag ang adto pang pag-abre sa klase sa bulan sa Hunyo gikinahanglan sa mga estudyante.

Sa datos, mokabat sa 1,267 ka mga school bags ang natunol ngadto sa mga estudyante butang nga gikalipay pag-ayo sa mga nakadawat.

Nanguna sa pagpang-apod apod sa nahisgotang mga bag si Agusan del Norte Governor Maria Angelica Rosedell Amante Matba uban ang mga kadagkoang opisyal sa probensya.

Sa kinatibuk-ang ihap, 402 niini ang natunol sa mga estudyante sa Simbalan National High School, 282 sa Simbalan Elementary School, 154 sa Bagang Elementary School, 139 sa Cabayugan Elementary School, 177 sa Labong Elementary School, ug 113 sa Monteverde Elementary School.

Gi-abagan ang maong distribusyon sa mga bag sa probensyal nga buhatan sa Provincial Social Welfare Population & Nutrition Services Office (PSWPNSO) nga gidumala ni Mrs. Daisybel O. Demavivas.