Wednesday, September 9, 2015

Rally Giisnab; Gate sa DepEd Giguba

Ni Angel Lyn F. Gaviola
Nanganti pa ang grupo sa raliyista nga mobalik kauban ang daghan pang pwersa ug dili mohunong hangtod nga dili maangkon ang tiunay nga hustisya alang sa mga biktima. Photo by Angel Lyn Gaviola.
BUTUAN CITY - Walay nahimo ang kadumalahan sa Departamento sa Edukasyon (DepEd)-Caraga dihang gidukdok ug giguba sa mga raliyista ang gate sa ilang opisina kagahapon sa buntag, sa may J.P. Rosales Avenue, Butuan City.

Nasayran nga nagpahigayon og rally ang progresibong grupo sa kabatan-onan, kauban ang pipila ka mga magtutdlo ug estudyante gikan sa dakbayan ug sa ALCADEV sa Surigao del Sur atubangan sa buhatan sa DepEd, dungan sa gisinggit niining hustisya alang sa mga biktima sa ‘extra judicial killings’ sa Lungsod sa Lianga, Surigao del Sur.

Gisinggit sa grupo nga ibasura sa DepEd ang Memorandum 221 series of 2013, dis-a nagtugot  sa mga ‘armed agents’ nga makasulod sa mga lumad nga tunghaan.

Ang DepEd memorandum no. 221 series of 2013 gipagawas aron maproteksyonan ang katungod sa kabataan higayong dunay mga kagubot sulod sa tunghaan nga pinirmahan ni DepEd Secretary Armin Luistro.

Nasuta nga dihang nahidangat sa ganghaan sa DepEd ang raliyista, wala kini diretsong nakasulod sa ‘ground’ sa ahensya human gisirado ang entrance gate niini.

Wala usab basta-basta nga nagpasulod og mga bisita ang buhatan, dihang anaa pa ang nagrally gumikan sa hugot nga gipatumang seguridad sa gitahasang guwardiya diin mamahimo lamang nga makasulod kadtong dunay opisyal nga transaksyon.

Human sa pipila ka mga mamumulong nga mipadayag sa ilang kasuko ug kahiubos sa kagamhanan, gihikot nila ang pulang panapton sa gate sa DepEd isip simbolo sa ilang pakigbisog ug agi’g pagpakita sa ilang kadismaya nga wala gitagad ang ilang gipaabot nga mga isyu gidukdok ug giguba pa nila ang gate gamit ang mga dagkong bato.

Sumala ni Dr. Isidro Biol Jr, tigpamaba sa DepEd-13, ilang girespeto ug gihatagan og lugar ang gipakitang emosyon ug gipadayag nga pagbati sa grupo tungod kay matod pa anaa sila karon sa estado sa pagbangotan.

“Ila man usab kana nga katungod ang pagpadayag sa ilang mga emosyon tungod niadtong nahitabo sa ilang tulo ka mga lider, so aro usab nga girespeto ang ilang gihimo”, tipik sa pamahayag ni Dr. Biol.

Human sa rally sa DepEd, mideretso pa atubangan sa buhatan sa Commission on Human Rights ang grupo, dungan sa panganti nga mobalik kini kauban ang mas daghan pang pwersa aron ipasibaw ang ilang mga yango-yango ug kadismaya sa sistema sa kasamtangang administrasyon.

No comments:

Post a Comment