Opisyal Nalambigit sa Illegal Logging?

Ni Alex Mapoy

PULITIKO. Gitin-aw ni DENR Caraga RED Nonito 

Tamayo nga nakadawat kini og impormasyon nga 

dunay pulitiko ang nilambigit sa illegal logging acti

vities, apan dihang gipanubayan, walay matumbok. 

Photo by Alex Mapoy

BUTUAN CITY – Gikomperma ni Department of Environment and Natural Resources (DENR) Caraga Regional Director Nonito Tamayo nga dunay impormasyon nga nadawat sa rehiyonal nga buhatan nga dunay mga piniling opisyal ang nilambigit sa illegal logging activities ning rehiyon.

Sumala ni DENR Caraga RED Tamayo, pinasubay sa impormasyon nga ilang nadawat, kasagaran matod pa sa nilambigit sa illegal logging activities mao ang pipila ka barangay kapitan ug barangay kagawad.

Ang nahisgotang mga impormasyon daling gipanubayan sa rehiyonal nga buhatan aron masuta kon unsa ka tinuod ang maong taho, apan, ni bisan isa ka piniling opisyal, walay matumbok nga kini nalambigit.

Dugang ni RED Tamayo, ang nahisgotang impormasyon makonsidera nga hearsay o tsismis sanglit walay mapamatud-an nga kapitan o kagawad nga kini ni-apil apil sa maong kalihokan.

Gitin-aw usab sa direktor, ni mayor, ni gobernador, o ni kongresista ang walay niduol kaniya aron mo suway pagkaryo o mo hangyo nga i-release ang nakompiska niining mga iligal nga pinutol nga kahoy.

Ni-angkon usab ang opisyal nga maglisod pagtumbok ang buhatan kinsa kadtong nalambigit sanglit panahon sa pagkompiska, manibat ang mga nilambigit niining indibidwal.

Bisan pa man, mas gipakusgan sa rehiyonal nga buhatan ang gihimong monitoring sa tibuok rehiyon aron hingpit nang mapahunong ang nasangpit nga kalihokan.