Monday, September 7, 2015

PressCon Gi-isnab


Ni Alex Mapoy
Giklaro ni Napolcom Caraga Regional Director Atty. Remeneo Valenzuela nga gi-imbitahan ang tanang naglangkob sa Criminal Justice System ning rehiyon, apan, wala lamang nakapadala og representante ang dinapit nga mga membro. Photo by Alex Mapoy
BUTUAN CITY – Gi-isnab sa pipila ka membro sa Criminal Justice System Caraga ang gipasiugdahan nga Press Conference sa National Police Commission (Napolcom) ning rehiyon subay sa pagselebrar sa 21st National Crime Prevention Week nga gipahigayon sa Mazaua Resort ning siyudad sa Butuan.

Hisayran ang naglangkob sa Criminal Justice System ang Community, Law Enforcement, Prosecution Service, Judiciary, ug Correctional nga kanhi naila nga Prison o Penitentiary.

Sa maong tigom, namatikdan ni Celso “Totsie” Licup sa Radyo ng Bayan Butuan nga wala ang presensiya sa mga representante sa Prosecution ug sa Judiciary.

Tubag ni Napolcom Caraga Regional Director Atty. Remeneo Valenzuela, gi-imbitahan ang mga nahisgotan, apan wala lamang nakapadala og representante aron maoy mo tambong sa maong tigom.

Alayon niini, nahimong hagit sa liderato sa Napolcom Caraga nga sa sunod tuig sa samang kalihokan, makatambong na ang tanang membro sa Criminal Justice System ning rehiyon.

Bugtong nakatambong sa maong aktibidad mao lamang sila Police Regional Office (PRO) 13 Regional Director PCSupt Vert Chavez, NAPOLCOM Reg'l director Remeneo Valenzuela, DILG LGOO Jason Lam, BFP Senior Insp. Rey Restauro, CHR representative Russell Valeroso, Rotary Club of Downtown Butuan representative Ma. Victoria Trugillo, ug BJMP Deputy Regional Director Supt. Dario Campos.

No comments:

Post a Comment