Bagani Forces Ipabungkag

Nila Alex Mapoy/Alvin Añonuevo

Pait ang kahimtang sa mga bakwit sa Tandag City Sports Complex kinsa nalisang sa bangis nga buhat sa Bagani Forces sa ilang lugar. Photo by Alvin Añonuevo.

TANDAG CITY – Ipabungkag ni Surigao del Sur Governor Johnny T. Pimentel sa militar ang grupong Bagani Force nga naghatag problema sa mga yanong residente sa bukirang bahin sa lungsod sa Lianga sakop sa nasangpit nga probensya.

Gi-angkon ni Gov. Pimentel dihang nahinabi sa Mindanao Centro Daily nga ilado na ang maong grupo sanglit dugay na kini nga naghatag suliran sa katawhan.

Dugang ni Gov. Pimentel, nagpatabang na ang probensyal nga kagamhanan sa 402^nd Brigade ilawom sa 4^th Infantry Diamond Division sa Philippine Army ubos sa pagdumala ni Major General Lactoa aron hingpit nang mabungkag ug patubagon sa salaud nga nahimo ang maong grupo.

Gikomperma sa gobernador nga gi-andam na nila ang tukmang kaso batok sa maong grupo aron manubag sa ilang gihimong kremin.

Mas kampante ang gobernador sa militar nga maoy mo bungkag sa grupong Bagani Force sanglit ang kasundalohan lamang maoy maka-adto sa bukirang bahin labi na nga atua didto naglihok ang gikalisangang grupo.

Giila sa opisyal ang nangulo sa maong grupo nga sila Marcos Vocales ug Val Tejero.

Pamugos sa gobernador, angayan nga mapagawas gilayon ang warrant of arrest batok sa maong grupo aron madakop sa labing dali nga panahon ang mga nahisgotan.

Subay sa hitabo, daling nagpahigayon og emergency meeting ang gobernador kagahapong adlawa dungan sa pag-awhag sa awtoridad nga himuon ang hinanaling aksyon.

Basi sa report, 5 ka sibilyan ang napatay sa grupo sulod lamang sa duha ka semana diin 2 sa lungsod sa San Miguel samtang 3 sa lungsod sa Lianga.

Samtang, giklaro ni 36^th IB Battalion Commander LTC Randolf Rojas nga ang lungsod sa Lianga, dili ilang hurisdiksyon.

Matod pa ni Rojas, bugtong hurisdiksyon sa ilang battalion ang lungsod sa Carrascal padulong sa Brgy. Buhisan, San Agustin samtang ang 75^th Infantry Battalion Philippine Army maoy nadestino sa lungsod sa San Agustin, Surigao del Sur.

Hugot usab giklaro sa opisyal, nagtamod ang ilang grupo sa Batakang Balaud.

Sa pikas bahin, gipahayag ni Servilliano Campos nga kulang pa ang mga serbisyo nga nahatag sa ilaha sanglit wala pa kaayo sila naplastar.

Gi-angkon ni Campos nga lisod ang ilang kahimtang sa Sports Complex sa dakbayan sa Tandag diin padayon pa silang naghulat sa tabang gikan sa lokal nga kagamhanan.

Laing bakwit, kinsa wala nagpaila nanawagan na sa goberno nga dakpon ang armadong grupo sanglit nakahatag kini og grabeng kahasol sa ilaha labi na nga nabiyaan ang ilang panimay, kahayopan, ug panginabuhian. 

Hisayran nga lagpas sa 2,000 ka mga bakwit ang nipahiluna sa Sports Complex kinsa na gikan sa Km. 6 Sitio Han-ayan, Brgy. Diatagon.

Gihakot ang mga bakwit sa 30 ka mga sakyanan gikan sa ilang gigikanang barangay ug gidala sa Sports Complex aron malayo sila sa kakuyaw.

Sa pagsulat ning balita, nagpahigayon og Aerial Survey sila 402 Brigade commander Col. Purisima, Governor Johnny T. Pimentel, ug pipila ka opisyal sa militar sa Sitio Haya-an, Brgy. Diatagon sakop sa lungsod sa Lianga aron masuta ang kahimtang sa maong dapit.