Bagani Nanghasi, 2 Gipatay

Ni Alex Mapoy

Haya sa magsuon nga walay kaluoy nga gipatay sa mga sakop ni Jasmin Acebedo. Si Acebedo maoy gitudlong lider sa grupong Bagani. Photo courtesy of Karapatan Caraga

SAN MIGUEL, Surigao del Sur – Grabe nga kalisang ang gibati sa mga sibilyan human gipatay sa armadong grupo ang duha ka magsuong lalaki nga ilang silingan sa Brgy. Siago lungsod sa San Miguel sakop sa probensya sa Surigao del Sur adtong Bernes sa gabii.

Ang gipangpatay naila nga sila Crisanto ug Ely “Loloy” Tabugol, pulos residente sa nahisgotang dapit.

Sumala ni Eliza Rose Pangilinan sa Karapatan Caraga, ang grupong Bagani maoy nipatay sa mga inosenteng biktima.

Gitumbok ni Pangilinan nga ang maong grupo, gipangulohan ni Jasmin Acebedo.

“Crisanto and Ely "Loloy" Tabugol were killed by armed men led by Jasmin Acebedo who's known as leader of bagani force in Siagao, San Miguel, Surigao del Sur on August 28, 2015 at around 7:00 in the evening.”

Subay sa hitabo, mokabat sa 332 ka mga pamilya katumbas sa 1,865 ka indibidwal ang napugos pagbakwit.

Ang mga bakwit pulos residente sa Purok 9 sakop sa naasoy’ng barangay.

Dumduman nga dunay 80 pa ka mga pamilya katumbas sa 443 ka mga lumad nga Manobo kinsa nanimuyo sa Brgy. Mabuhay sakop sa maong lungsod ang pabiling namakwit human gihuraw sa grupong Bagani sa sayong bahin ning bulana.

Gikabalaka sa mga residenteng lumad nga sila ang isunod pagpatay sa Bagani force hinungdan nga napugos kini pagbakwit. Photo courtesy of Karapatan Caraga

Alayon niini, nipaluyo ang Karapatan Caraga sa singgit sa mga pamilyang biktima dungan sa panawagan sa kagamhanan nga dis-armahan ang maong grupo aron mahunong ang gihimong pagpanghuraw ngadto sa katawhang lumad ug mahatagan og hustisya ang mga biktima.

Sa pagsulat niini nga balita, wala pay komento ang habig ni Acebedo kabahin sa alegasyon nga gihapak batok kanila.