Rotational Brownout Ipatuman sa Mindanao

Ni Alex Mapoy

BUTUAN CITY – Gikabalak-an nga magpatuman og halapad nga rotational brownout ang tanang kooperatiba sa kuryente sa Mindanao sa higayon nga masinatian na ang grabeng epekto sa El Niño Phenomenon nga una nang gitagna sa Philippine Atmospheric, Geophysical and Astronomical Services Administration (Pagasa) nga masinatian sa mga bulan sa Septembre hangtod Disyembre ning tuiga.

Ang tibuok Mindanao, dunay kinatibuk-ang demand sa kuryente nga 1,632-MegaWatt kada adlaw ug kon masinatian ang epekto sa El Niño, ang tibuok isla, makulangan na og 148-MegaWatt nga suplay sa kuryente.

Sumala ni Aneco Technical Services Department Manager Engr. Darwin T. Daymiel, dinhe na mapugos ang matag kooperatiba sa kuryente sa bisan asang dapit sa Mindanao nga magpatuman sa tagpila ka oras nga rotational brownout.

Dinhe sa Agusan del Norte, ang Agusan del Norte Electric Cooperative (Aneco) Inc. posible nga magpatuman og 2 hangtod 3 ka oras nga rotational brownout kon mahitabo ang maong gikabalak-an.

Hisayran ang Aneco gisuplayan sa National Power Corporation (NPC) - Power Sector Assets and Liabilities Management Corporation (PSALM) og kuryente nga 29.7-MegaWatt; 10-MegaWatt sa FDC Misamis; 15-MegaWatt sa Therma Marine, Inc; ug 15-MegaWatt sa Mapalad Power Corporation kada adlaw.

Ang maong suplay subra sa kasamtangang demand sa mga konsumidor nga 55-MegaWatt hinungdan nga wala pay angayang ikabalaka ang katawhan.

Sa karon, wala pa nakasinati ang mga Agusanon og brownout, gawas na lamang kon dunay maintenance nga pagahimuon ang Aneco.