Watershed Natamna’g Marijuana

Ni Alex Mapoy

Photo courtesy of Butuan City Water District

BUTUAN CITY – Gikomperma ni Anticala Tribal Watershed Producer Cooperative President Danilo Dandanon nga nasudlan og druga ang watershed sa nanglabay nga katuigan.

Ang pagkomperma ni Dandanon gihimo dihang gipangutana kini ni Gabriela Caraga Secretary General Atel Hijos bahin sa druga atol sa pagbisita sa Makabayan Bloc uban si BCWD General Manager Engr. Anselmo Sang Tian  sa PPP Treated Bulk Water Project nga nahimutang sa Sitio Iyao, Brgy. Anticala sakop ning siyudad.

Sumala ni Dandanon, niadtong siya pa ang kapitan sa ilang barangay, duna siyay napapriso tungod sa pagtanom sa pipila ka punoan sa marijuana didto sa Sitio Sinaka nga sakop sa nahisgotang barangay ug na sulod sa watershed area.

Dugang ni Dandanon, subay sa hitabo, nakadesisyon ang iyang kadumalahan nga magbutang og Inspection Gate human nakadawat og impormasyon nga dunay mag-uuma nga magdala og container padulong sa siyudad sa katarongan, sudlan og gasoline, apan sulod matod pa sa container, mga marijuana.

Gitin-aw sa nahisgotan, ang halin sa marijuana mao ra usab ang ipalit og gasolina pagpauli sa mag-uuma sa bukid.

Sa pagsulat ning balita, giklaro sa nauwahi nga dili na siya makaseguro kon duna pa bay nananom og marijuana sanglit wala na siya nakadawat og impormasyon bahin niini.

“Kon druga Ma’am, wala kaayo koy kasayuran niana. Pero, sauna, ako pay barangay captain, nakapapriso nako nianang marijuana. Naa sauna didto sa Sinaka. Ambot lang kaha karon, naa ba kaha pud. Mao bitaw sauna, nagbutang ko og inspection gate. Naay mag-uuma, isulod ang marijuana sa container padulong sa ubos. Ang halin sa marijuana sa ubos, maoy ipalit og gasolina,”pagkomperma ni Dandanon.