Hangyo sa Konsumidor, Gisanong

Ni Alex Mapoy

BUTUAN CITY – Positibong gisanong sa kadumalahan sa Butuan City Water District (BCWD) ang hangyo sa mga konsumidor nga lakip mapadal-an og BCWD Advisory kada adlaw.

Una nang gipaabot sa pipila ka mga konsumidor sa water district sa Mindanao Centro Daily nga unta maapil kini sa kada adlaw nga BCWD Advisory sa buhatan labi na sa pagpaabot sa nag-unang advisory nga ipagawas.

Gikabutyag ni BCWD Senior Public Relations Officer Ramil S. Barquin dihang nahinabi ning mantalaan, malipayon nilang ipahibalo nga granted ang maong hangyo nga maapil sa BCWD Advisory sa buhatan kada adlaw.

Dugang ni Barquin, bugtong buhaton sa mga konsumidor nga gustong malakip sa BCWD Advisory mao lamang ang pagpaabot og mensahe sa buhatan pinaagi sa pag-text sa Hotline Number 0917 6767 457.

Ipaila lamang matod pa ang pangalan sa nag-text ug ipadayag nga gusto kining malakip sa BCWD Advisory kada adlaw sa ingon makadawat kini og daily advisory gikan sa naasoy’ng buhatan.

Pinaagi sa pagdawat sa daily advisory gikan sa BCWD, sayo kining maabisohan kabahin sa operisyon labi na kon dunay ipatuman nga temporary shutdown sa pasilidad o kaha pagputol sa suplay sa tubig tungod sa kusog nga ulan nga nipalubog sa suba sa Taguibo.

Nanghinaut ang opisyal nga pinaagi niini, mahimong updated ang tanang konsumidor sa operisyon sa water district ug kahimtang sa suplay sa tubig.