Casualties sa Bomba, Gipanghimakak

Ni Alex Mapoy

Sakyanan sa kasundalohan nga mahimong gamiton sa operisyon

BUTUAN CITY - Gipanghimakak sa Armadong Kusog sa Pilipinas ang pasiatab sa rebeldeng New Peoples Army (NPA) nga dunay pito ka buok patay ug mga angol sa tropa sa goberno dihang gipabusikad ang gitanom nga bomba sa National Highway, Sitio Pagao, Brgy. Campo, Bacuag, Surigao del Norte sa nakalabay'ng semana.

Sumala ni Cpt Joe Patrick A. Martinez, Spokesperson sa 4th Infantry Division, Philippine Army, walay patay sa habig sa militar dihang gipabusikad sa mga rebelde ang bomba nga gitanom sa maong dapit.

Dugang ni Capt. Martinez, ang gihimo sa mga rebelde usa ka dakong kalapasan sa Comprehensive Agreement on Respect to Human Rights and International Humanitarian Law (CARHRIHL) labi na sa pagamit og bomba sa walay paglantaw nga dunay sibilyan ang posibleng madamay.

"Una, walay kaswalti sa mga sundalo sa pag pamomba sa mga rebelde. Tataw nasad ang kalapasan sa CARHRIHL kon Comprehensive Agreement on Respect to Human Rights and International Humanitarian Law ang mga rebelde ilabina sa paggamit sa ginadiling bomba kung diin adunay posibleng maapil nga sibilyan," pagtin-aw ni Capt. Martinez.

Dakong bakak usab matod pa ni Capt. Martinez ang pasangil ni Ka Oto, tigpamaba sa Guerilla Front 16A sa NPA nga gi-torture adiser gipatay ang rebeldeng babae.

Gikondina usab sa opisyal ang gihimong pag-recruit sa mga rebelde ngadto sa mga inosenteng sibilyan labi na ang mga lumad kinsa gihimong kasangkapan aron sangkapon ang mga sundalo.

"Kabahin sa enkwentro sa bukid dapit sa Sitio Zapanta Valley, Brgy Bangayan, Kitcharao, Agusan del Norte, walay kamatuoran ang ilang (NPA) pasumangil nga bun-og ang lawas sa mga naatol nilang kauban. Ang tinuod didto ang ilang tataw nga pag rekrut sa mga makaluluoy natong lumad nga ilang armasan aron atobangon ang mga sundalo," dugang sa opisyal.

Alayon niini, nanawagan ang opisyal sa kadagkoang opisyal sa mga rebelde nga undangon ang maong pagpang-recruit sa mga inosente ug mas maayong mobalik na lamang kini sa sabakan sa goberno ug magpuyo nga malinawon.