Saturday, November 28, 2015

Pamilya Nabungkag; Druga Gibasol

Ni Alex Mapoy
PPA DOJ Butuan Chief Probation and Parole Officer Cristina R. Argente
BUTUAN CITY – Daghang pamilya ang nabungkag ug nahimong miserable ang pamuyo human nalambigit sa gidiling druga.

Pinasikad sa imbestigasyon nga gihimo sa mga staff sa Parole and Probation Administration (PPA) Butuan ngadto sa tanang aplikante pagka-probationer, nasuta nga malipayon pa ang pamuyo sa pamilya niadto, dihang wala pa nalambigit sa drugas, apan dihang nasudlan ang maong bisyo, nabungkag ang pamuyo, nagkatibulaag ang mga membro sa pamilya, ug nahimong miserable ang pamuyo.

Sumala ni PPA DOJ Butuan Chief Probation and Parole Officer Cristina R. Argente, sayang ang malipayong pamilya nga napundar sa magtiayon diin ang nahimong makaluluoy mao ang mga anak.

Dugang ni Argente, niadtong wala pa nalambigit sa gidiling druga ang kadaghanan sa mga aplikante, giyukboan pa sa mga silingan ang pamilya tungod sa subra ka relihiyoso diin ang mga anak, pulos pa matinahuron ngadto sa isigkatawo labi na niadtong hamtong na og edad.

Nausab matod pa sa opisyal ang tanan, dihang nakasulod ang druga sa pamuyo sa mga nahisgotan diin ang kanhi dalaygon nga pamilya, nahimo nang sagbot sa katilingban.

Pinakapait nga kamatuoran kon ang padre de pamilya na maoy unang malambigit sa druga sanglit mahimo kining sundugon sa mga anak gumikan kay gituohan sa mga nahisgotan nga sakto ang gipakitang buhat sa amahan.

Subay niini, gitambag sa opisyal nga mas maayong hunungon ang pagpakabuang sa drugas aron dili mabungkag ang pamuyo sa pamilya ug malambigit sa nagkadaiyang kremin tungod sa impluwensya sa druga.

No comments:

Post a Comment