Kawad-on, Gisakyan sa Drug Syndicate

Ni Alex Mapoy

PDEA Caraga Regional Director Julius R. Navales

BUTUAN CITY – Gisakyan sa sindikato sa druga ang kawad-on nga nasinatian sa kabus nga pamilya hinungdan nga lisod pugngan ang pagkuyanap sa drugas sa kabaranggayan.

Gikabutyag ni Philippine Drug Enforcement Agency (PDEA) Caraga Regional Director Julius R. Navales, gipahimuslan sa mga sindikato ang nasinatiang kawad-on sa pamilyang kabus pinaagi sa paghanyag sa daling pangwarta – ang pagnegosyo sa gidiling drugas.

Daghan matod pa ni Navales ang maengganyo pagnegosyo og drugas sanglit gawas nga dali ra ang kwarta, dili pa kini maghago pag-ayo.

Basi kini sa obserbasyon sa direktor kon nganong hangtod karon, lisod sumpoon ang drugas sa Barangay Ong Yiu – ang gibansagang distribution center sa druga.

Gitin-aw sa opisyal, kon susihon ang maong barangay, kasagaran namuyo mao ang mga squatter ug pulos nag-antos sa kapobrehon.

Aminado ang opisyal nga sayod nang daan ang mga nalambigit niining klaseha sa panginabuhi nga kuyaw ang pagnegosyo og drugas, apan ila kining gisudlan sanglit dali ra kaayo ang kwarta.

“Malaki ang Ong Yiu. Mostly, makikita mo, an diyan lahat, squatter area, poverty. So, lucrative business kasi ang illegal drugs, eh. Yong tao, kahit they know na risky ang kuan, easy money kasi,” pahayag ni Navales.

Subay niini, nanawagan ang opisyal sa publiko nga magpakabana ug suportahan ang kampanya batok druga aron wala nay kaugmaon nga maguba tungod lamang sa drugas.