Pagpanghilo sa ALCADEV, Dakong Bakak

Ni Alex Mapoy

NAHADLOK. Gusto na nga mo pauli ang mga bakwit sa ilang dapit nga gigikanan, apan nahadlok kini nga hasi-on sa September 1 Lumad Killers. Courtesy of Karapatan Caraga

BUTUAN CITY – Gipanghimakak sa Malahutayong Pakigbisog alang sa Sumusunod (MAPASU) ang alegasyon batok sa gipatay nga si Alternative Learning Center for Agricultural and Livelihood Development (ALCADEV)  Executive Director Emerito “Emok” Samarca.

Hisayran nga gi-alegahan ni Marcos Bocales nga ang ALCADEV Executive Director maoy naghilo sa panghunahuna sa mga lumad pinaagi sa pagtudlo sa idolohiya sa rebeldeng New Peoples Army (NPA).

Sumala ni MAPASU Spokesperson Josephine Pagalan, wala pa namugna ang ALCADEV, nagtunhay nang daan ang komunista dungan sa pagpamugos nga dili tinuod ang pasangil ni Bocales ngadto sa namatay’ng Samarca.

Gipasabot ni Pagalan, sukad matod pa napundar ang ALCADEV, daghan na nga kabataang lumad ang nakahuman sa kolehiyo kinsa nibalik sa komunidad aron tudloan sa hustong edukasyon ang nahibiling kaliwatan.

Pamugos sa nauwahi, dakong tabang ang maong kahugpongan sa mga lumad labi na sa gihatag nga mga pagbansay alang sa mas produktibong pagtikad sa yutang kabilin ug tungod niini, nahimo nga mas milig-on ang ekonomiya, pulitika, ug kultura sa mga lumad.

“Sa iyang 11 ka tuig nga pagtunhay daghan na ang among mga kaliwatan nga natapos sa kolehiyo ug high school nga mibalik sa pagserbisyo sa mga lumadnong komunidad isip mga magtutudlo. Daku ang natabang kanamong mga Lumad ang mga pagbansay sa agrikultura sa among sustenidong pagpananom ug pagpamuhi sa kahayopan nga nakatabang sa  paglambo  sa among ekonomiya, politika ug kultura,” pahayag ni Pagalan.

Giklaro usab sa nauwahi, dugay na nga gustong mamauli ang mga lumad nga namakwit, apan wala kini nahitabo sanglit ang demanda sa mga nahisgotan nga dakpon ang mga kriminal sa September 1 Lumad Killing, wala pa nadakpan ug hangtod pabiling gawasnon ang mga nahisgotan, dili usab nila maseguro ang ilang seguridad.