Organic Farming Lisod I-promote - DA

Ni Alex Mapoy

DA Caraga Field Operations Division Chief Rebecca R. Atega

BUTUAN CITY – Gi-angkon sa Department of Agriculture (DA) Caraga nga naglisod kini pag-promote sa Organic Farming ngadto mga Caraganons nga mag-uuma.

Sumala ni DA Caraga Field Operations Division Chief Rebecca R. Atega, lisod usbon ang kinaiya sa tawo labi na nga na anad kini pagamit sa synthetic nga paagi sa panguma.

Bisan pa man, dugang ni Atega, naningkamot pa gihapon ang rehiyonal nga buhatan pag-asdang sa maong promotion aron hangpon pagbalik sa mga mag-uuma ang organikong paagi sa pagtikad sa uma.

Gitin-aw sa opisyal, wala lamang sila nakatutok sa ilang gihimo ngadto sa mga mag-uuma kondi lakip na usab ngadto sa mga piniling opisyal sanglit pipila kanila matod pa ang wala nakasabot.

“We are not only promoting to the farmers but also to local leaders. Pipila lang sa ato leaders ang nakasabot ana,” pahayag ni Atega.

Kamatuoran matod pa sa opisyal, ubay – ubay pa nga mga local government units (LGUs) ang hangtod karon, wala pa nagpalabang og ordinansa aron suportahan ang maong kampanya.

“Naay mga LGU nga hangtod karon, wala pa nipasaka og balaudnon relative to that,” dugang sa opisyal.

Usa matod pa sa masakit nga kamatuoran, dunay pipila ka mag-uuma nga nagsunog og ohot atubangan pa sa munisipyo ug ang lokal nga panggamhanan, wala nakabadlong.