Epekto sa Pagpangabuso Nagpadayon

Ni Alex Mapoy

Photo courtesy of BCWD

BUTUAN CITY – Padayon pang nasinatian sa katawhang Butuan ang epekto sa pagpangabuso sa kinaiyahan nga hinimoan sa pipila ka indibidwal ngadto sa Taguibo Watershed sa nanglabay’ng katuigan hinungdan nga subsob usab ang gihimo niining information drive ngadto sa publiko labi na sa kabataang magtutungha.

Sa gihimong Bisita Eskwela sa Butuan City Water District (BCWD) ngadto sa nagkadaiyang tunghaan ning siyudad labi na sa elementarya ug sekondarya sama sa Pareja Integrated Secondary ug Elementary School, pipila ka minuto nga gipasabot sa mga personahe sa naasoy’ng buhatan ang kabahin sa kabililhon sa tubig ingon man sa kinaiyahan.

Lakip sa gipasabot ngadto sa tanang nitambong gikan sa mga magtutungha, magtutudlo, ug school administrators ang kabahin sa mahimong epekto kon maguba ang kinaiyahan.

Gikabutyag ni BCWD Senior Public Relations Officer Ramil S. Barquin, walay laing tuyo sa maong kalihokan kondi mao ang pagpataas ug pagpalapad pa sa kahibalo sa mga nahisgotan kabahin sa epekto kon maguba ang kinaiyahan sa ingon kini motabang ug mo lihok isip kontribusyon sa pagpakabana sa ingon mapanalipdan ang kinaiyahan.

“BCWD UPDATE (11/16/15): Students, teachers and school administrators of Pareja Integrated Secondary and Elementary School participated in the BCWD Bisita Eskwela at the school's covered court this morning. BCWD Bisita Eskwela is an information drive for secondary and elementary students to increase their awareness and concern on the importance of water and the environment, especially the Taguibo Watershed, to sustain lives,” mensahe ni Barquin.

Hisayran nga dugay nang gihimo ang maong kalihokan sa nahisgotang buhatan, apan, padayon nila kining gihimo sa ingon ang mga bag-ong tubo mapahigmata kabahin sa kasamtangang kahimtang sa watershed.