Performance-Based Bonus Gidawat

Ni Alex Mapoy

DENR Caraga Communication and Development Office Supervisor Eric Gallego

BUTUAN CITY – Gikalipay sa pipila ka mga personahe sa Department of Environment and Natural Resources (DENR) Caraga human nakadawat og Performance-Based Bonus (PBB).

Hisayran nga pipila kanila ang nakadawat og P35,000 alang sa empleyado nga makonsidera nga very satisfactory ang performance sa walay pagtan-aw kon unsay posisyon nga nahuptan; dunay P25,000 alang sa satisfactory ang performance; ug pinakaubos P15,000 alang sa average nga performance.

Sumala ni DENR Caraga Communication and Development Office Supervisor Eric Gallego, gihatagan og PBB ang mga nahisgotan human nilagpas sa gihatag nga quota labi na sa pagpananom og kahoy alayon sa gipakusgan nga National Greening Program (NGP) sa gobernong Aquino.

Dugang ni Gallego, mismo si DENR Caraga Regional Director Nonito M. Tamayo ang nilawas nga nipaabot sa iyang pagtimbaya sa paningkamot sa mga nahisgotang nakadawat og PBB.

Angay lamang matod pa sa opisyal nga hatagan og ganti ang mga nahisgotan sanglit nihimo kini sa ilang kabahinan sa tahas nga gisangon kanila.

Hisayran nga sa bulan lamang sa Oktobre 2015, ang rehiyonal nga buhatan, nakatanom na og 9,917,325 ka mga semilya sa nagkadaiyang klase sa kahoy sa tibuok rehiyon.

Gitanom ang naasoy’ng mga semilya ngadto sa 12,520 ka ektarya katumbas sa 75% sa kinatibuk-ang ektaryang nga gi-alokar nga pagatamnan ilawom sa programang National Greening ni Pangunong Aquino.