Pulis Topnotcher sa Pagka-Bababero?

Ni Alex Mapoy

PSupt. Martin Mercado Gamba

BUTUAN CITY – Gipanghimakak sa Police Regional Office (PRO) Caraga nga topnotcher ang kapulisan sa isyu sa pagpangabit.

Una nang nikatap ang impormasyon nga nanguna ang kapulisan kon hisgotan ang pagka-babaero.

Gikabutyag ni PSupt. Martin Mercado Gamba, kanhi Spokesperson sa PRO 13, angkonon nila nga dunay pipila sa ilang kaubanan nga nangabit, apan dili usab matod pa siya mo tuo nga nag-numero uno na ang kapulisan niana nga isyu.

Dugang ni Gamba, walay record nga makapakita nga nagtumbok nga ang mga pulis maoy nahimong topnotcher sa maong bisyo.

Gitin-aw sa opisyal, diyutay lamang sa mga pulis ang nakapangabit kon itandi sa kinatibuk-ang ihap sa mga pulis ning rehiyon.

“Dili mi mo tuo nga kami ang number sa pagka-babaero. Di ka makakita og record o statistics nga ang pulis nag-number 1,” paghimakak ni Gamba.

Hisayran ang isyu sa pagka-babaero sa pipila ka mga pulis, dili na bag-o pa sa pandungog sa katawhan sanglit bisan asa nga rehiyon sa tibuok nasod, pipila ka mga pulis ang gikiha sa ilang mga asawa human wala nakahatag og tarong nga sustento.

Sa maong bisyo, dili lang ang han-ay sa kapulisan ang nalambigit kondi halos tanang sektor sa katilingban ang nisulod sa maong bisyo bisan pa kadtong walay klaro nga pangita.