Bomba Gipabusikad, 7 Sundalo Patay?

Ni Alex Mapoy

BACUAG, SURIGAO DEL NORTE – Pito matod pa ka mga sundalo ang patay samtang dili pa matino ang ihap sa mga angol human gipabusikad sa Bagong Hukbong Bayan (BHB) sa New Peoples Army (NPA) ang gitanom nga bomba sa National Highway, Sitio Pagao, Campo, Bacuag, Surigao del Norte sa nakalabay’ng semana.

Sumala ni Ka Oto, tigpamaba sa Guerilla Front 16A sa NPA, mga sakop matod pa sa 30^th Infantry Battalion, Philippine Army ang mga napatay ug mga angol.

Dugang ni Ka Oto, gihimo kadto isip panimawos ngadto sa tropa sa goberno human gilusad ang serye nga pagpamomba, pagpangkanyon, ug pag-strapping ngadto sa komunidad gamit ang machine gun sa Zapanta Valley, Brgy. Bangayan lungsod sa Kitcharao, Agusan del Norte ug sa bukirang bahin sa Brgy. Camam-onan, Gigacuit, Surigao del Norte.

Pinasubay sa datos sa rebelde, gipahayag sa nauwahi nga mokabat sa 30 ka mga bomba ang gipabusikad, 19 ka mga bala sa kanyon ang gitira sa maong mga lugar, ug 2 ka mga komunidad ang nadislokar.

Gi-angkon sa nahisgotan, isa ka babaeng manggugubat ang napatay sa serye nga engkwentro dihang nakabagat ang tropa sa kaaway.

Basi sa ilang paghiling sa patay’ng lawas sa maong manggugubat, grabeng bun-og sa lawas ang na angkon sa naulahi ug gipaantos adiser matod pa gipatay.

Wala usab panganli sa nahisgotan kon unsay pangalan sa namatay’ng manggugubat sa ingon masayod ang kabanay sa namatay.

Nabilin usab ang 2 ka mga armas ug bag packs sa mga rebelde dihang kini miikyas subay sa paggukod sa mga sundawo kanila.