Dog Bites sa SurSur, Nisulbong

Ni Alex Mapoy

SURIGAO DEL SUR – Doble-kayod ang Provincial Health Office nga dili na madugangan ang ihap sa kaso sa dog bites sa tibuok probensya human nilansang sa kapin 700 ang ihap sa mga biktima.

Basi sa datos, ang tibuok probensya dunay dog bites nga 732 ka buok diin ang mga biktima daling nadapatan og medikasyon.

Sa impormasyon sa Philippine Information Agency (PIA)Caraga, gipahayag matod pa ni PHO Chief Dr. Eric Montesclaros nga 684 sa mga nahisgotan o 93.44% niini ang nahatagan og tissue culture vaccine (TCV).

Taliwala nga taas ang incidence sa dog bites, apan gipaneguro ni Dr. Montesclaros nga walay rabies ang mga iro nga nakapaak.

Subay niini, gi-awhag ang hingtungdang buhatan nga tudloan ang tanang namuhi og iro kon unsaon nga mahimo kining responsable nga tag-iya sa ingon dili kini mapaakan.

Una nang gipahayag ni Provincial Veterinary Officer Dr. Gervacio Yparraguirre nga sa kada tuig, gipakusgan ang gihimo nilang pagpamakuna ngadto sa mga binuhi nga iro sa tabang sa ilang counterpart sa mga lungsod nga sakop sa probensya.

Gidasig usab sa opisyal ang tanang namuhi og iro nga makig-alayon sa pinakaduol nga buhatan sa Municipal Veterinarian o kaha City Veterinarian sa ingon mabakunahan ang binuhing iro sa anti-rabies.