Human Trafficking Kuyanap

Ni Alex Mapoy

KUYANAP. Gikinahanglan ang nilangkob ug konkretong lakang nga himuon sa hingtungdang ahensya ug sa katawhan aron masumpo sa hingpit ang maong suliran sa rehiyon.

BUTUAN CITY – Gikomperma sa Department of Justice (DOJ) Caraga nga kuyanap pa gihapon ang Human Trafficking sa rehiyon sa Caraga.

Kon basehan matod pa ang datos, dunay 26 ka mga kaso ang natala sa tuig 2014 samtang 36 ka mga kaso sa kasamtangang tuig.

Gikabutyag ni Clementino C. Rabor sa DOJ Caraga, kaylap pa gihapon ang Human Trafficking taliwala sa paningkamot sa kagamhanan pinaagi sa Regional Development Council - Gender & Development Coordinating Committee (RDC-GADCC) Caraga.

Dugang ni Rabor, kasagaran sa mabiktima mao kadtong mga indibidwal nga nanimuyo sa bukid kinsa gi-engganyo nga manarbaho ug gipasaligan nga mahaw-as gikan sa kalisod kon sudlan ang maong matang sa pangita.

Bunga sa kawad-on, hangpon gilayon ang maong tanyag labi na kon nakita ang bayhon sa nag-engganyo nga nakasuot sa mahalong sapot ingon man alahas ug labaw sa tanan, nakita ang kahimtang sa pamuyo nga ni-umento.

Nagpanikad matod pa kini sa pag-uban, apan ang nahitabo, pagbaligya sa kaugalingong unod maoy nasudlan nga trabaho taliwala nga supak sa kaugalingong kabubut-on.

Ang Human Trafficking, sumala sa mga eksperto nga daghan kini og porma sama sa Trafficking of Children, Sex Trafficking, Forced Marriage, Labor Trafficking, ug Organ Trade Trafficking

Alayon niini, nanghinaut ang opisyal nga pinaagi sa nilangkob nga paningkamot sa tanang ahensya sa kagamhanan uban sa pag-abag sa katawhan, pagsumpo kini nga suliran sa umaabot nga panahon.