Kabaw ug Binhi Gipanghatag

Ni Alex Mapoy

Photo courtesy of Department of Agriculture (DA) Caraga

BUTUAN CITY – Daghang mag-uuma nga nitambong sa gipahigayong turnover ceremony sa mga subprojects ug equipments nga gipangunahan ni Agriculture Secretary Proceso Alcala ang nakadawat og kabaw ug binhi sa Caraga State University (CSU) Gymnasium, Barangay Ampayon, sakop ning siyudad sa nakalabay’ng adlaw.

Basi sa impormasyon ni DA Caraga Information Section Chief Emmylou T. Presilda, unom ka kabaw, pipila ka mga sakong binhi sa Registered Rice Seeds, OPV Corn Seeds, ug mga binhi sa gulay ang gipanghatag ngadto sa mga mag-uuma.

Dugang ni Presilda, kadtong nahatagan sa nahisgotang kalipayon mao kadtong mag-uuma nga nakadaug sa gihimong raffle sinaksihan sa liboang nitambong sa kalihokan.

Gitin-aw sa opisyal, ang nadawat nga kahayopan ug mga binhi dako na kaayo og tabang ngadto sa nahimong palaran sa pa raffle sa ahensya.

Ang samang pa raffle, dili na bag-o pa sa katawhan sanglit gihimo usab kini sa ahensya sa Agusan del Sur dihang personal nga nibisita ang kalihim aron pangunahan ang pagtunol sa multi-million pesos nga proyekto.

Dulot bukog usab ang pagpasalamat sa mga nahimong palaran sa naasoy’ng pa raffle sanglit wala sila nagdahom nga sa ilang pagtambong, nakadala sila og kabaw nga mahimong kaabag sa ilang panginabuhian.