Promotion Gikalipay Apan Gikaguol

Ni Alex Mapoy

BUTUAN CITY – Gitakdang hulipan ang kadumalahan sa Parole and Probation Administration (PPA) DOJ Bislig epektibo karong Desembre 16 ning kasamtangang tuig.

Hisayran nga ibalhin si CPPO Wilma Tajonera kinsa maoy kasamtangang nagdumala sa PPA DOJ Bislig ngadto sa PPA DOJ Tandag.

Gikabutyag ni PPA DOJ Butuan Chief Probation and Parole Officer Cristina R. Argente, dako ang kalipay sa iyang liderato sanglit usa sa iyang mga staff maoy umaabot nga magdumala sa PPA DOJ Bislig.

Dugang ni Argente, ang gitakda nga mo hulip ni Tajonera mao si Parole and Probation Office II Alex Castaños kinsa maoy magsilbing Officer-In-Charge sa naasoy’ng buhatan samtang paabuton ang Official Appointment gikan sa kaulohan.

Gitin-aw sa opisyal, gikalipay niya ang na angkon nga promotion kang Castaños sanglit “deserving” kini nga mo dawat.

Aminado usab ang opisyal nga nasubo kini sa pagka-promote ni Castaños sanglit nawad-an kini og usa sa mga sakop nga seryosong nibuhat sa katungdanan nga gisangon kaniya.

“Performer talaga na staff. Naguol ako talaga kasi nawalan ako ng tauhan, pero nalipay ako kasi magiging head na siya sa office sa PPA DOJ Bislig. Congratulation Alex, saludo kami sa imo,” mensahe ni Argente.

Taliwala pa man sa maong kasubo, nipatigbabaw pa gihapon matod pa sa opisyal ang iyang kalipay sa promotion nga na angkon sa usa sa iyang mga sakop.

Sa kabahinan ni PPA Caraga Regional Director Josefina Singco, wala siya nagduha-duha pag-promote sa mga staff nga kugihan sanglit nakita niya kini sa performance.