No Christmas Break Batok Illegal Loggers

Ni Alex Mapoy

Photo courtesy of DENR Caraga Communication and Development Office Supervisor Eric Gallego

BUTUAN CITY – Nipakanaug na og kamandoan ang rehiyonal nga buhatan sa Department of Environment and Natural Resources (DENR)Caraga sa tanang personahe nga dili magpinakloy pagbantay sa illegal logging activities panahon sa Pasko.

Sumala ni DENR Caraga Communication and Development Office Supervisor Eric Gallego, katuyoan niini nga walay illegal loggers nga makapalusot og kahoy sa Agusan del Sur ug Surigao del Sur panahon sa Pasko hinungdan nga gimandoan ang tanang personahe labi na kadtong gitahasan pagbantay sa logging activities sa rehiyon nga pahugtan ang pagbantay.

Pinasikad sa datos sa Enforcement Division ilawom sa Technical Services Office, ang mga kahoy nga nakompiska tungod sa kawalay dokumento niabot sa 833,944 board feet sa ikatulong kwarter ning tuiga.

Kahinumdoman nga daan nang gipahayag ni DENR Caraga Regional Director Nonito Tamayo nga ni-ubos ang rata sa illegal logging ning rehiyon kon itandi sa nakalabay’ng katuigan.

Komitido matod pa ang ahensya nga sumpoon ang kalihokang iligal nga pagpamutol og kahoy dungan sa pagpakusog sa pagpatuman sa National Greening Program (NGP) sa kagamhanang Aquino.