Mayorya sa Aplikante, Nalambigit sa Druga – Parole Butuan

Ni Alex Mapoy

APLIKANTE. Gipasabot ni PPA DOJ Butuan Chief Probation and Parole Officer Cristina R. Argente ang mga aplikante pagka-probationer o pagka-parolee nga lisod aprubahan ang aplikasyon kon kini nalambigit sa gidiling drugas. 

BUTUAN CITY – Giangkon sa kadumalahan sa Parole and Probation Administration (PPA) Butuan nga mayorya sa mga piniriso nga ni-aplay pagka-probationer sa buhatan mao kadtong nalambigit sa gidiling drugas.

Sumala ni PPA DOJ Butuan Chief Probation and Parole Officer Cristina R. Argente, subo nga palandungon ang paspas nga pagsulbong sa ihap sa mga aplikante labi na nga kadaghanan kanila, nalambigit sa drugas diin kon dili user sa druga, nahimong pusher ug ang nakapait, pipila kanila ang nahimo pang user ug pusher.

Dugang ni Argente, kasagaran nga aplikasyon labi na kon nalambigit sa drugas ang lisod aprubahan sa ahensya hinungdan nga kon unsa ka daghan ang aplikasyon, daghan usab ang dili ma-aprubahan.

Pamugos sa opisyal, tungod sa kadaghan sa aplikasyon kinsang hingtungdan nalambigit sa druga ang angay na nga mo undang labi na niadtong nalambigit sa druga nga wala pa nadakpan sanglit ang buhatan sa PPA DOJ Butuan, dili mahimong dangpanan o lutsanan aron likayan ang sentensya nga ipahamtang sa korte kanila.

Nagsunod sa mga kasong gi-atubang sa mga aplikante ang pagpangawat, physical injuries, acts of lasciviousness, illegal possession of firearm, ug kalapasan sa Violence Against Women and their Children (VAWC).

Gitin-aw sa opisyal, ang mga kasong pagpangawat, physical injuries, ug acts of lasciviousness nahimo sa mga aplikante tungod gihapon sa impluwensiya sa gidiling druga.