Agri Projects ug Equipment, Gitunol

Ni Alex Mapoy

Agriculture Secretary Proceso J. Alcala

BUTUAN CITY – Lima ka mga farm-to-market roads (FMRs) ug mga ekipos pang-uma ang gitunol sa Department of Agriculture (DA) sa pagpanguna ni Agriculture Secretary Proceso J. Alcala nga mapahimuslan sa mga Agusanon subay sa opisyal nga pagtunol sa Caraga State University (CSU), Barangay Ampayon sakop ning siyudad sa Butuan, adlaw’ng Lunes.

Sumala ni DA Caraga Information Section Chief Emmylou T. Presilda, ang lima ka mga FMRs nagtumong pagsuporta sa pagpalambo sa Agri-Enterprise sama sa Abaca sa mga lungsod sa Santiago ug Kitcharao sakop sa probensya sa Agusan del Norte ug Rubber Production and Marketing sa Agusan del Sur.

Dugang ni Presilda, gipundohan ang maong mga FMRs subprojects og balor P208 milyones kansang pundo gikuha ilawom sa Philippine Rural Development Project (PRDP). 

Gawas niana, gitunol usab ni Alcala ang mga gamit pang-uma nga naglangkob sa Rice Reaper, Corn Picker, ug Hand Tractor nga nagkantidad og P7.8 milyones.

Direktang mapahimuslan ang naasoy’ng mga ekipos sa nagkadaiyang hugpong sa mga mag-uuma ug kooperatiba.

Ang maong mga ekipos gitunol subay sa pagpakusog sa Mechanization Program sa ahensya.

Subleng gipasabot sa kalihim ngadto sa liboang katawhan basi sa mensahe ni Presilda nga giseguro sa kagamhanang Aquino nga pulos konkreto nga FMRs ang mahatag sa ingon dili kini daling maguba bisan bundakan pa kini sa makusog nga ulan o kaha initon sa taas nga panahon.

“The DA is committed to provide resilient and quality roads for our farmers by providing concreted FMR that can withstand any weather conditions ensuring the flow of goods from farm to the market,” pahayag ni Alcala.