Surigaonon Nalisang; Magahat Niataki

Ni Alex Mapoy

Photo credit to Karapatan Caraga

SAN MIGUEL, SURIGAO DEL SUR – Gikalisang sa mga membro sa  Kahugpungan sa mga Mag-uuma sa Surigao del Sur (KAMASS) human yanong gipatay ang kaubanang membro sa armadong grupo sa P-5 Hagimitan, Brgy. Bolhoon, San Miguel adtong alas – 4:00 sa ka adlawon, adlaw’ng Huwebes.

Sa impormasyon nga gipaabot ni Karapatan Caraga Secretary General Eliza Pangilinan, naila ang biktima nga usa ka Orlando ‘Lito” Raboca, hingkod ang edad, residente sa naasoy’ng dapit.

Dugang ni Pangilinan, pulos naka-bonnet matod pa ang halos 30 ka mga kalalakin-an kinsa pulos armado sa M16 rifle.

Human napatay matod pa ang biktima, giransak sa armadong kalalakin-an ang usa ka sari-sari store nga tapad sa panimay sa nahisgotan ug gipangpukaw ug gitapok ang tanang residente sa maong lugar.

Gipahibawo sa mga responsable ang silingan sa biktima nga ila kining gipatay aron mahunong ang padayon niining pagsuporta ngadto sa New Peoples Army (NPA) dungan sa pagbahad nga mo balik sila aron patyon ang uban pang membro sa KAMASS.

“Orlando "Lito" Raboca, 53 years old, a KAMASS member (local peasant organization) was killed last November 12, 2015 at 4:00 in the morning in Hagimitan P-5, Brgy. Bolhoon, San Miguel, Surigao del Sur in his house by around 30 armed men wearing bonnets and all were armed with M16 rifle. Afterwhich, the said armed menransacked the near sari-sari store and gathered the people in the neighborhood and told them that they killed Lito to stop his support to the NPA and threatened them that they will be back and kill more KAMASS members,” mensahe ni Pangilinan.

Sa laing impormasyon, giila matod pa ni San Miguel Mayor Alvaro Elizalde ang biktima nga usa lamang ka yanong tigbantay sa Bulho-on Elementary School kinsa nagdawat og binulang honorarium balor P2,000 gikan sa lokal nga panggamhanan.

Nibati matod pa og kaluoy si Mayor Elizalde sa gidangatan sa biktima sanglit sayod kini nga kulang ang gidawat niining binulan nga honorarium alang sa pamilya, apan yano lamang kining gipatay sa mga responsable.

Ang gihimo matod pa sa responsableng grupo ang nakuha sa Closed Circuit Television (CCTV) nga gimuntar sa maong dapit.

Personal nga giila sa mayor ang grupo nga Magahat diin basi sa CCTV record, nangabot ang mga nahisgotan alas-4:00 sa ka adlawon sakay sa 2 ka puti nga Starex van.

Human gibaharan sa grupo ang mga residente, gipusil ang biktima tumong sa agtang ug nagbilin pa matod pa kini og “warning letter” nga dunay heading nga Magahat Regional Command.

Kahinumdoman, ang maong grupo maoy responsable sa September 1 Lumad Killing sa lungsod sa Lianga sakop sa maong probensya diin ang gitudlong mga suspek ang pabilin pang gawasnon taliwala nga nailhan na ang mga nahisgotan.